Tablau Llanw ac arolygon y tywydd

Cyn mentro allan ar hyd yr arfordir, ar y tir neu’r môr, cofiwch gael cipolwg ar y tablau llanw.

Os nad y'ch chi’n gyfarwydd â siâp y traethau a’r pentiroedd, fe allech chi fynd i drafferth os byddwch wedi mentro ychydig yn bellach na’r bwriad, neu os bydd amser wedi hedfan heibio wrth i chi fwynhau'ch hunan.

Ar y dudalen hon, fe welwch frasamcan o amser ac uchder y llanw yn Aberystwyth.

I gael syniad o amser y llanw mewn lleoliadau eraill ym Mae Ceredigion, gallwch dynnu neu ychwanegu amser fel hyn:

Bar Aberteifi ......... 33 munud yn gynharach

Pont Aberteifi ....... 23 munud yn gynharach

Aberporth ............ 21 munud yn gynharach

Cei Newydd ......... 7 munud yn gynharach

Aberaeron ........... 5 munud yn gynharach

Y Borth .............. 11 munud yn ddiweddarach

Aberdyfi............. 18 munud yn ddiweddarach

Glandyfi ............ 38 munud yn ddiweddarach

Sylwch: Os bydd y tywydd yn wael, gall effeithio ar uchder y llanw.

Arolygon Tywydd

Gallwch gael arolygon y tywydd ar gyfer yr wythnos gan wasanaeth tywydd S4C.

Tywydd S4C

Y Tywydd

Dros y blynyddoedd, mae arfordir Ceredigion wedi cael ei daro gan dywydd dramatig. Mae rhai o stormydd diweddar y gaeaf wedi cael cryn sylw ar y newyddion ledled y byd.

Ond mae tywydd dramatig hefyd yn rhan o’n chwedloniaeth. Chwedl Cantre’r Gwaelod, sy’n adrodd hanes boddi Maes Gwyddno, yw un o’n chwedlau oesol.

I gael mwy o’r hanes ac i gael gwybod ble i fynd i ddod â'r chwedl yn fyw heddiw, ewch i’r tudalennau am Chwedlau Ceredigion.

Mae nodweddion eraill ein tywydd, fel niwl y môr a tharth y dyffrynnoedd, yn dal dychymyg ffotograffwyr sy’n ymweld â Cheredigion bob adeg o’r flwyddyn.

O bryd i’w gilydd, bydd golau’r haul a diferion niwl neu law yn cyfuno i greu enfys liwgar dlos.